• Ballina > Komunikatat për shtyp

Arkivi i lajmeve

2009

• janar

Komunikatat për shtyp

Prishtinë, Kosovë, 7 prill 2008 - Komisioni Kushtetues ia dorëzon Kushtetutën e propozuar Presidentit të Republikës së Kosovës

Komisioni Kushtetues i Republikës së Kosovës ka miratuar dhe nënshkruar në mënyrë formale Kushtetutën e Republikës së Kosovës, sot në orën 13:00 në Bibliotekën Kombëtare. Në ceremoninë e nënshkrimit, Komisioni i paraqiti Kushtetutën e propozuar Presidentit të Republikës së Kosovës, z.Fatmir Sejdiu. Presidenti do t’ia dorëzojë Kushtetutën e propozuar Kuvendit të Republikës së Kosovës. Së shpejti pritet miratimi formal i Kushtetutës nga ana e Kuvendit të Republikës së Kosovës.

Komisioni Kushtetues ka punuar për më shumë se një vit në përgatitjen e Kushtetutës për Kosovën. Gjatë këtij procesi, Komisioni ka konsultuar shumë Kushtetuta të shteteve demokratike si dhe ka diskutuar me shumë ekspertë vendor dhe ndërkombëtar. Po ashtu Komisioni Kushtetues ka organizuar procesin për informim publik, i cili është zhvilluar në dy faza, për qëllim të përfshirjes së qytetarëve në procesin e hartimit të Kushtetutës. 

Të gjitha komentet e bëra nga qytetarët dhe organizatat e interesuara përmes diskutimeve në debate publike, tryeza të rrumbullakëta, letrave të dërguara përmes postës elektronike, postës dhe faqes së internetit, janë organizuar nga Sekretariati i Komisionit Kushtetues dhe janë shqyrtuar nga grupet punuese të Komisionit Kushtetues. Afërsisht 35% e komenteve të dorëzuara nga qytetarët dhe organizatat e ndryshme janë inkorporuar plotësisht apo pjesërisht në Kushtetutën e miratuar në mënyrë formale nga ana e Komisionit Kushtetues.

Kushtetuta e propozuar e Republikës së Kosovës dhe informatat tjera në lidhje me procesin e përfshirjes së qytetarëve janë publikuar në faqen e internetit www.kushtetutakosoves.info.

Komisioni Kushtetues dëshiron të shpreh falënderimet e tij të sinqerta të gjithë qytetarëve dhe organizatave profesioniste për komentet, vërejtjet dhe sugjerimet e tyre në lidhje me Projekt-Kushtetutën e Republikës së Kosovës.

Për informata shtesë në lidhje me Kushtetutën e Republikës së Kosovës, procesin për hartimin e kushtetutës dhe ngjarjet publike, dhe procesverbalet nga të gjitha takimet publike, ju lutem të vizitoni: 

www.kushtetutakosoves.info , www.ustavkosova.info , www.kosovoconstitution.info.

Për Komisionin Kushtetues:

Komisioni Kushtetues i Kosovës është themeluar nga Presidenti i Kosovës në përputhshmëri me rekomandimet e Emisarit Special të Kombeve të Bashkuara, Ahtisaarit, në Raportin  për statusin e ardhshëm të Kosovës, të dorëzuar Sekretarit të Përgjithshëm të Kombeve të Bashkuara.  Komisioni e reflekton diversitetin e Kosovës dhe është përgjegjës për hartimin e Kushtetutës që përfaqëson interesat e të gjithë qytetarëve të Kosovës.

Informatat për kontakt:

Sekretariati i Komisionit Kushtetues

Qeveria e Kosovës, Ndërtesa e re, kati i 8-të, zyra nr. 803

Sheshi Skënderbeu

10000 Prishtinë, Kosovë

Tel: +381 38 20014 208